Алдағы президент сайлауында Қазақстан Халықтық Коммунистік партиясының атынан бақ сынайтын үміткер Жамбыл АХМЕТБЕКОВ: ЕКІНШІ ОРЫН ҮШІН КҮРЕСУГЕ КҮШІМ ЖЕТЕДІ

Биылғы сайлау науқанындағы жалғыз дебютант – Қазақстанның Халықтық Коммунистік партиясы ұсынған үміткер Жамбыл Ахметбековті саясаттанушылар «статист» деп атаған болатын. Бірақ, үміткер мұнымен келіспек емес. 2011 жылғы президент сайлауы мен 2012 жылғы парламент сайлауында екінші орынды көздеген үміткер Ж.Ахметбеков «Интерфакс-Қазақстан» агенттігі тілшісіне берген сұхбатында компартияның алдағы жоспарлары мен саяси амбициялары жайлы айтып берді.

- Сіз Қазақстан бойынша сайлауда әлеуметтік желілерді пайдаланған бірінші үміткерсіз. Жалпы, үгіт-насихаттың осы үлгісі сіздің сеніміңізді ақтай алды ма? Осы әлеуметтік желілер арқылы қанша адамды өзіңізге тартамын деп ойлайсыз?

- Шынымды айтайын, сайлаушылардың әлеуметтік желілер мен блогтар арқылы түсіп жатқан сұрақтарына, ұсыныстарына жауап беріп үлгермей жатырмын. Қазір олармен менің атымнан төрт модератор жұмыс істеп жатыр, олардың ішінде менің екі қызым да бар. Модераторлар әрине, менімен ойласып, содан соң жауап береді. Дегенмен, сұрақтың қарша борағаны соншалық, төрт адам да аздық етіп отыр. Оған кем дегенде 10 модератор қажет шығар.

Мен әлеуметтік желілерді интернет пайдаланушыларға өзім жайлы ақпар беру құралы ретінде қарастырғанмын. Бірақ, мен бұл ресурс диалог, қызу пікірталас алаңына айналады деп ойлаған жоқпын. Тіпті, сайлаушылар маған өзімді қалай ұстап, жұртшылық алдына шыққанда қай тақырыпта сөйлеуім керектігі жөнінде кеңес те береді, қызықты идеялар ұсынады. Басқаша айтқанда, сайлаушылармен кері байланыс орнады деуге болады.

Қазіргі кезде әлеуметтік желіде менің 5 мыңнан астам «досым» бар, олардың саны күн сайын «жаңбырдан кейінгі саңырауқұлақтай» көбейіп келеді. Олар менің сенімді тұлғаларым ретінде әрекет етеді десем де болады. Өйткені, әлеуметтік желідегі ақпарат солар арқылы таралады. Өз есебім бойынша, мен «виртуалды» әдіспен 700-900 мың дауыс жинаймын.

Үміткер Ғани Қасымовтың да менің жолымды қуғанын естіп жатырмын. Оның Желі арқылы қанша жақтас табарын уақыт көрсете жатар. Осылайша, Қасымов менің нақты сайлау додасында ғана емес, виртуалды бәсекелесіме айналмақ.

- Сайлау бюллетенінде сіздің фамилияңыз төрт үміткердің ішінде бірінші болып жазылады. Бұл сайлау қорытындысына қаншалықты ықпал етуі мүмкін?

- Әрине, психологиялық фактордың әсері бар. Сайлаушы дауыс беретін кабинаға кірген кезде бюллетенде бірінші тұрған менің фамилиямды көріп, тізім үміткерлердің танымалдығына қарай жазылған деп ойлап қалуы әбден мүмкін.

Бірақ мен бос қиялдан аулақпын. Біздің халқымыздың сауаты мол және бұл бірінші рет өткізіліп отырған сайлау емес. Әрине, фамилиямның тізімде бірінші тұрғаны қуантады. Дегенмен оған аса иек артудың қажеті жоқ.

- Жамбыл Аужанұлы, сіздің осы саяси науқандағы негізгі мақсатыңыз қандай? Мысалы, сіздің оппоненттеріңіздің бірі Ғ.Қасымов осы сайлауға қатысудағы мақсаты – 2012 жылы парламентте Патриоттар партиясының фракциясын құру екенін мәлімдеді. Коммунистер партиясы да парламентті көздеп отыр ма?

- Біз осы жолғы науқанда жинақтаған тәжірибемізді алдағы уақытта парламент сайлауында пайдаланбақпыз. Коммунистік партия бұл сайлаудан бас тартпайды, оған міндетті түрде қатысады. Оған қоса, біз 2012 жылғы сайлауда бірінші орынға шығып («Нұр Отан» партиясынан кейін – «ИФ-Қ»), Мәжілісте Халықтық Коммунистік партияның фракциясын құрмақпыз. Сөйтіп, халықтық билікке бір табан жақындаймыз.

- Осы сайлауда неше пайыз дауыс жинайсыз деген сұраққа жауап бермедіңіз. Ендеше, екінші орын үшін күресуге ниетіңіз бар ма, оған күшіңіз жете ме? Басты қарсыластарыңыз – Мэлс Елеусізов пен Ғани Қасымовқа қарсы күресте қандай көзіріңіз бар?

- Екі апталық насихат жұмыстарынан кейін мен өзімнің екінші орын үшін күресуге мүмкіндігім барын түсіндім. Ал, қанша пайыз дауыс жинайтыным бөлек мәселе.

Мен қазақ және орыс тілдерін жетік білемін, бәсекелестеріме қарағанда әлдеқайда жаспын, ең бастысы мен халық арасынан шыққан адаммын. Менің басты көзірім осы. Мен Елеусізов пен Қасымов сияқты ел танып-білген, әккі саясаткер емеспін. Олар тәжірибесіне сүйенеді, мен адалдыққа арқа сүйеймін.

- Сіздің сайлауалды бағдарламаңыз «Үш бастамаға» негізделген: жоғарғы оқу орындарының түлектерін жұмысқа орналастыруға кепілдік беру, мемлекет тарапынан коммуналдық шығындар үшін өтемақы төлеу және ел азаматтарының табысын дұрыс бөлу үшін төменгі күнкөріс шегін 200 мың теңгеге жеткізу. Сіз мұны қандай әдіспен есептедіңіз?

- Біз дамыған елдерге, соның ішінде күнкөріс шегі 1 мың еуро немесе 200 мың теңгені құрайтын еуропалық мемлекеттердің тәжірибесіне сүйендік. Қазақстан қай жерге барса да өзін бай мемлекет ретінде көрсетеді. Ендеше, ең төменгі күнкөріс шегін де соған сәйкестендіруіміз керек. Ал, егер біздің мемлекетіміз кедей болса күнкөріс шегін 15 мың теңге күйінде қалдырып, сөздің шынына көшейік.

- Сіз Коммунистік партия мен «Нұр Отан» билік партиясын бірнеше рет салыстырдыңыз. Сіздің партияның «Нұр Отаннан» айырмашылығы қандай? Өйткені, екі партияның мақсаттары мен ұрандары бір-біріне ұқсас келеді. Мысалы, Қазақстанды гүлдендіру, халықтар достығы... деген сияқты...

- Біздің басты айырмашылығымыз, біздің партия халықтық билік орнатуды көксейді. Яғни, жекелеген олигархтар емес, халықтың өзі басқаратын Қазақстан халықтық Республикасын құрғымыз келеді.

«Нұр Отан» партиясының депутаттары халықтың атынан әрекет етеміз деп ойлайды. Бірақ, оларға мұндай құқықты кім беріпті? Олар партиялық тізіммен сайланған жоқ па? Ендеше, «Нұр Отандықтар» халықтың өкілдері емес.

- ҚХКП съезінде партия басшысы Владислав Косарев ұйымның жұмысын жалғастыруға қаржы тапшы болып отырғанын айтқан болатын. Қаржылық көмек көрсететін демеушілер табылды ма, партияның сайлау қорында қанша ақша бар?

- Таныс кәсіпкерлер маған көмек қолын созды. Бірқатар ұйымдар ерікті түрде сайлау қорына қаржы салды. Бұл қаражат менің аймақтарды аралауыма, сайлау алды штабы қызметкерлерінің жалақысына және т.б. жұмсалуда. Әзірге мен қорда қанша қаржы барын айта алмаймын. Біздің болжауымызша, ондағы қаржы үгіт-насихат науқанының соңына дейін жетуі тиіс.

- Сұхбатыңыз үшін рахмет!

Наурыз, 2011 жыл
(C) 2011, "Интерфакс-Қазақстан" агенттігі.
Пайдаланғанда сілтеме жасау міндетті.

Наурыз, 2011
© 2024 "Интерфакс-Қазақстан" агенттігі
Пайдаланғанда сілтеме жасау міндетті

Айдарлар мұрағаты